Косата секојдневно паѓа, во просек од 50 до 80 влакна кои се заменуваат со нови. Состојбата при која од косата паѓаат повеќе влакна отколку што се создаваат се нарекува ефлувиум (effluvium). Доколку овој процес не се сопре, тогаш настанува ќелавост – медицински позната како aлопеција (alopecia).
Алопецијата може да биде привремена или трајна.

Дијагнозата се поставува врз основа на клиничката слика и наод од трихограм (микроскопски преглед на коренот на влакното), а лекувањето зависи од причината поради која се појавила. Ако причината може да се санира, косата повторно ќе почне спонтано да расте.

СИМПТОМАТСКИ ЕФЛУВИУМ – претставува минливо опаѓање на косата, од 150 до 1.000 влакна дневно. Причините се предизвикани од диети, психички стрес, пораѓај или доење кај жените, одредени лекови, операции, недостаток на железо во организмот…

АНДРОГЕНА АЛОПЕЦИЈА – претставува генетско наследно заболување, позастапено кај машката популација, но ги афектира и жените.
 Кај мажите, започнува од предниот дел од главата кон централниот дел и на крајот кон краевите. 
Кај жените, на почетокот, проретчувањето на косата е ограничено и не ги зафаќа шишките, потоа проретчувањето продолжува во централниот дел и е поизразено и на крајот сеуште може да има прамени на коса кај шишките. Кај некои жени истовремено може да се јави зголемена влакнетост на екстремитетите и надусницата.

Кај мажите, третманот вклучува локална апликација на миноксидил (во консултација со лекар и орална терапија со финастерид)
Кај жените, се препорачува локална апликација на раствори со естрогени и орална терапија во консултација со лекар.

АЛОПЕЦИЈА АРЕАТА – претставува ненадејно губење на косата, кое се манифестира во вид на добро ограничени тркалезни или овални области. Се смета дека игра улога генетската предиспозиција, но и влијанието на други фактори како емоционалниот стрес и присуство на хронични воспалителни проблеми (заби, синуси, грло) или нарушувањето на имуниот систем.
Болеста најчесто трае 3-6 месеци, по што во најголем дел од случаите повторно израснува коса.

ТРИХОТИЛОМАНИЈА – состојба при која губењето на косата се должи на намерно и најчесто несвесно кубење на влакната. Оваа состојба е типична за децата и вообичаено е несвесен одговор на привремен стрес. Кај возрасните се јавува поретко и е резултат на некое психичко нарушување.

ДИСТРОФИЧЕН ЕФЛУВИУМ
Овој тип алопеција се јавува при хемотерапија и радиотерапија. Состојбата се карактеризира со дифузно губење на косата, а најчесто по завршување на третманот кој довел до опаѓањето, косата се обновува.